Piginnaasanik ineriartortitsineq

Peqatigiiffimmi siulittaasuuguit, sungiusaasuuguit imaluunniit karsersuisuuguit apeqqutaatinnagu, piginnaasanik ineriartortitsinermut pilersaarutitsigut periarfissaqarputit suliannik pitsaanerulersitsinissamut aammalu peqatigiiffimmi atuuffigisanni nukittorsarnissannut. Webinarit workshopillu assigiinngitsut aqqutigalugit isumassarsianik nutaanik sakkussanillu pissarsisinnaavutit.

Peqatigiiffinni sungiusaasunut pikkorissarneq

– sungiusaaneq pitsaasumik misigisaqarfiusunngortinniarlugu piareersarluarit

Kalaallit Nunaanni Timersoqatigiit Kattuffiata sungiusaasutut tunngaviusumik pikkorissarneq neqeroorutigaa, tassani peqatigiiffinni sungiusaasutut pikkorissuullutillu tunniusimallutik suliaqarnissamut pisariaqartunik piginnaasaqalersitsisoq.

Pikkorissarneq sungiusaasunut nutaanut misilittagalinnullu tulluuppoq, sungiusaasutullu atuuffimmik suliatigut inuttullu ineriartortitserusuttunut.

Pikkorissarneq immikkoortunut marlunnut agguagaavoq, taamaalillutit misilittakkannut naleqqunnerpaamik toqqaasinnaallutit:

• Immikkoortoq 1 sungiusaasunut nutaanut tunngavissanik pitsaasunik pilersitsivoq. Sammineqarlutik sungiusaasup atuuffia, kajumissuseqalersitsineq kiisalu sungiusaanermik tunngaviusumik pilersaarusiorneq.
• Immikkoortoq 2 sungiusaasunut misilittagalinnut sammitinneqarpoq. Sammineqarlutik sungiusaanermik pilersaarusiorneq annertusisaq, siulersuisinnaaneq kiisalu sungiusaasut tarnikkut ineriartornerat (trænerpsykologi).

Siulersuisunut tunngaviusumik pikkorissarneq

– aqutsineq nukittorsarsiuk kattuffillu pitsaanerulersillugu

Pikkorissarneq una sivikitsumik sukumiisumillu ingerlasuuvoq, timersornermik kattuffinni siulersuisunut atuuffimminnik akisussaaffeqarlutillu pitsaalluinnartumik isumaginninnissamut pisariaqartunik piginnaasaqalersitsisoq.

Pikkorissarnermi pingaarnerit tassaapput siulersuisut periusissatut (strategisk) sulinissaat, aningaasaqarnikkut akisussaassuseqarlutik ingerlatsinissaat aammalu suliassaminnik ersarissumik paasisaqarnissaat.

Oqaloqatigiinneq, misissueqqissaarnerit (cases) sungiusaatillu atorlugit peqataasut sakkussanik atorneqarsinnaasunik tigussaasunik pissarsisarput.

Pikkorissarnermi ilaatigut sammineqarput:

• Siulersuisut atuuffiat akisussaaffiilu
  Malittarisassanik, ulluinnarni aqutsinermik aammalu aaqqissuussaanikkut suliassanik paasinninneq.
• Aningaasaqarneq aqutsinerlu
  Missingersuusiorneq, naatsorsuutinik ingerlatsineq aammalu aningaasaqarnikkut akisussaassuseq.
• Periusissiat ineriartornerlu
  Qanoq siulersuisut kattuffimmut sammiviiliisarnersut ineriartornermillu pilersitsisarnersut, kiisalu attaveqaqatigiinneq.
• Siulersuisut sulinerat pitsaasoq
  Suleqatigiinneq, ataatsimiinnernik aqutsineq aalajangiiniartarnerlu.
• Sammisassanik pilersaarusiorneq ingerlatsinerlu
  Ataatsimeersuarnerit aaqqissuussinerillu ilanngullugit.

Pikkorissarnerit webinarillu ukioq kaajallallugu ingerlanneqartassapput.

Suliffiit Aalasaartut (Aktive Arbejdspladser)

– suliffiit peqqinnarnerusut aalalluarnerusullu pilersikkit

Pikkorissarneq “Suliffiit Aalasaartut” tassaavoq ilinniartitsineq sulinermut qanittumik ingerlanneqartoq, aqutsisunut sulisunullu suliffimmi peqqinnerulernissamut aalalluarnerulernissamullu suliniutinik aallartitseqqullugit isumassarsisitsisoq.

Siunertaavoq suliffeqarfinni Kalaallit Nunaanni tamani:

• Atugarissaarnermik siuarsaanissaq
• Ataatsimoornermik nukittorsaanissaq
• Peqqissutsimik annertusaanissaq

Pikkorissarnermi peqataasut Aalasa-mi aallartitanngorlutik (Aalasa-ambassadører) ilinniartinneqassapput. Taakku suliniutinik nutaanik aallartisaanissamut sulisinnaapput aammalu ulluinnarni allannguisinnaasut pilersitseqataaffigalugit.

Ilinniartitsineq assigiinngisitaartumik ingerlanneqartarpoq, ataatsimut saqqummiinerit, oqaloqatigiinneq kiisalu sungiusaatit atorluarlugit.

Peqataasut isumassarsianik tigussaasunik suliaqassapput, aammalu pitsaasunik misilittakkanik (best practice) suliffimminni toqqaannartumik atorsinnaasaminnik saqqummiivigineqassallutik.

Pikkorissarnerup kingorna

Peqataasut pissarsiarissavaat:

• Peqqissutsimut suliniutinut sakkussat tigussaasut
• Suliffimmi aalalluarnerup siuarsarnissaanut isumassarsiat
• Suliffeqarfimmi allannguisinnaanermut piginnaasat
• Sulisut suliffeqarfiullu tamarmik iluaqutigisinnaasaannik periarfissat

Taamaalilluni suliffeqarfik peqqinnarnerulerlunilu aalalluarnerulissaaq, sulisut atugarissaarnerat ataatsimoornerallu nukittunerulissallutik.