Suliffeqarfiit Aalasut

Suliffiit Aalasut (Aktive Arbejdspladser)

– suliffimmi atugarissaarneq, peqqissuseq ataatsimoornerlu pilersikkit

“Suliffiit Aalasaartut” tassaavoq pikkorissarneq anguniagaqarfiusoq, aqutsisunut sulisunullu Kalaallit Nunaanni suliffiit peqqinnarnerulernissaannut aalalluarnerulernissaannullu isumassarsianik sakkussanillu tigussaasunik tunisisoq.

Pikkorissarneq ulluinnarni suliffimmi ingerlatsinermut tunngaveqarpoq, sammisaallutillu qanoq suliniutit mikisut angisuullu sulisut akornanni atugarissaarneq, kajumissuseqarneq aammalu ataatsimoorneq annertusarsinnaaneraat.

Pikkorissarneq pillugu

Pikkorissarnermi peqataasut suliniutinik peqqissutsimik sulinerullu nuannersuuneranik nukittorsaataasinnaasunik ineriartortitsillutillu aallartitseqataanissaat sulissutigissavaat.

Peqatigitillugu allannguutit ataavartut, suliffiup kulturiannut ilanngunneqarsinnaasut, pilersinneqarnissaat pingaartinneqarpoq.

Ilinniartitsineq saqqummiinerit, oqaloqatigiinneq kiisalu sungiusaatit akornanni paarlaaqatigiittarluni ingerlanneqartarpoq. Peqataasut case-nik isumassarsianillu tigussaasunik suliaqassapput, suliffimminnullu angerlaassinnaasaminnik toqqaannartumillu atulersinnaasaminnik pissarsillutik.

Pikkorissarnermiit suna pissarsiarissaviuk?

Peqataasutut makku pissarsiarissavatit:

• Ulluinnarni aalasaqarnerunissamut timigissarnerunissamullu isumassarsiat tigussaasut.
• Suliffimmi atugarissaarnerup suleqatigiinnerullu nukittorsarnissaanut sakkussat.
• Suliffeqarfinnit allanit aammalu pitsaasunik misilittakkanit (best practice) isumassarsiat.
• Attaveqaateqarfinnik (netværk) pilersitsinissamut kiisalu suliffinnit allaneersunik misilittakkanik avitseqatigiinnissamut periarfissat.

Aalasa-mi aallartitanngorit (Aalasa-ambassadør)

Pikkorissarnerup pingaarutilittut ilaa tassaavoq Aalasa-mi aallartitanngornissamut ilinniarneq.

Aallartitatut (ambassadøritut) pingaarutilimmik inissisimaffeqassaatit, makkunanngalu suliaqarsinnaassallutit:

• Suliffimmi peqqinnartumik aalalluartumillu ingerlatsinerup maligassiuisutut siuttuuffiginissaa.
• Suliniutinik sammisassanillu nutaanik aallartitsinissaq.
• Suleqatinik kajumilersitsineq suliffimmilu kulturip nukittorsarneranut tapersiineq.

Kina peqataasinnaava?

Pikkorissarneq aqutsisunut sulisunullu suliffimminni atugarissaarnermut peqqissutsimullu sulerusuttunut naleqquppoq.

Inassutigineqarpoq suliffeqarfik ataaseq peqataasunik arlalinnik peqataatitaqassasoq, taamaaliornikkut sulineq suliffeqarfiup iluani siammasissumik ingerlanneqarsinnaaqqullugu.

Atugarissaarnermut ineriartortitsinermullu aningaasaliineq

“Suliffiit Aalasaartut” aqqutigalugu ataatsimoorlusi peqqissutsip atugarissaarnerullu periusissatut ineriartortinneqarnissaannut pitsaasumik tunngavissaqalissaasi.

Pikkorissarneq isumassarsianik nutaanik kiisalu sakkussanik tigussaasunik tunniussivoq, suliffimmik aalalluarnerusumik, kajumissarnarnerusumik piujuartitsinerusunillu pilersitsinissamut iluaqutaasunik.