Ukkatarisaq: Amerlanerit Aalasa

Ukkatarisaq Amerlanerit Aalasa anguniagaqarpoq Kalaallit Nunaanni tamarmi timikkut aalatitsinerup, atugarissaarnerup aammalu ataatsimoornerup siuarsarneqarnissaat. Anguniarneqarpoq innuttaasut amerlanerusut, ukiui, periarfissai najugaqarfiilu apeqqutaatinnagit, peqataatitsiviusuni timersornikkut ataatsimoorfiusuni peqataasinnaanissaat.

Suliniutit najukkani pisariaqartitat aallaavigalugit pilersaarusiorneqarlutillu ineriartortinneqartarput, timersoqatigiiffiit, kajumissutsimik suliallit kommunillu peqatigalugit. Suliniutit suleqatigiinnerillu aqqutigalugit aalannissamut kajumissuseqalersitsisunik sinaakkusiisoqarpoq, timikkut eqqarsartaatsikkullu atugarissaarnerup nukittorsarneqarnissaanut.

Pingaarnerusut suliniutit ilaatigut makkuupput:

• Game Greenland, aqquserngit atorlugit timersornermik kiisalu najukkani sungiusaasunik ilinniartitsinermik aqquteqartumik aalatitsiviusunik ataatsimoorfissanillu pilersitsisoq.
• Takorluukkanut aallartitat (Visionsambassadørerit), paasisitsiniaanikkut, maligassiuinikkut aammalu najukkani paasissutissiisarnikkut innuttaasunik kajumissaarisartut.
• Parasport, innarluutilinnut timersornermi peqataasinnaanissamut naligiimmik periarfissaqarnissamik sulissuteqartoq.
• Suliffeqarfiit Eqeersimaartut, suliffeqarfinni aalasaqarnerup atugarissaarnerullu siuarsarneqarnissaannut anguniagaqartoq.

Ataatsimut isigalugu ukkatarisaq timersornermi peqataasut amerlisarnissaannik kiisalu ataatsimoorfiit nukittuut, peqataatitsiviusut piujuartitsisullu pilersinneqarnissaannik sulivoq.