Angusaqarnissamut isumaqatigiissut 2023–2027

Ataatsimoorluta takorluugaq anguniarlugu: Kalaallit Nunaat timigissarnerpaamik inuuffigineqartoq

Kalaallit Nunaanni Timersoqatigiit Kattuffiat aamma Naalakkersuisut 2023–2027-mut atuuttussamik angusaqarnissamut isumaqatigiissuteqarput. Isumaqatigiissut Kalaallit Nunaanni timersornerup ineriartortinnissaanut kiisalu innuttaasut peqqissuunerulernissaat, atugarissaarnerulernissaat ataatsimoornerulernissaallu anguniarlugit timigissarneq annertusarneqarnissaanut suleqatigiinnissamut sinaakkutaavoq.

Peqqissuunerusumik inuiaqatigiinnik pilersitsinissaq ataatsimoorullugu akisussaaffiuvoq

Angusaqarnissamut isumaqatigiissummi anguniakkat, suliniutit, angusassat nalunaarusiornissarlu pillugit ataatsimut naatsorsuutigineqartut aalajangersarneqarput. Tamatuma saniatigut Naalakkersuisut politikkikkut salliutitaasa aammalu Timersoqatigiit Kattuffiallu nammineq periusissiaasa akornanni oqimaaqatigiittoqarnissaa qulakkeerneqarpoq.

Timersorneq timigissarnerlu inuiaqatigiinnik peqqissuunerusunik pilersitsinermi pingaarutilimmik inissisimapput. Taamaattumik nunatsinni tamarmi peqataaneq periarfissallu pitsaasut pilersinniarlugit pisortat, kattuffiit suliffeqarfiillu kiisalu inuit akornanni suleqatigiinneq ataatsimoorussamik akisussaaffiuvoq.

Takorluugaq: 2030-mi Kalaallit Nunaat nunarsuarmi timigissarnerpaamik inuuffiussaaq

Timersoqatigiit Kattufiat anguniarpaa Kalaallit Nunaat 2030-mi nunarsuarmi timigissarnerpaamik inuuffiussasoq.

Takorluugaq anguniakkanut pingaarnernut pingasunut tunngavoq:

• Innuttaasut amerlanerusut timigissartalissapput
• Inuit amerlanerusut ataatsimoorluni sammisaqartarnerni peqataalissapput
• Suleqataasut amerlanerusut piujuartitsisumik ineriartortitsisoqarnissaa anguniarlugu suleqatigiilissapput

Anguniarneqarpoq inuiaqatigiinnik pilersitsinissaq, tassani timigissarneq inuuneq tamaat, meeqqaniit utoqqarnut, ulluinnarni nalinginnaasumik ilaatinneqassalluni.

Periusissiat suliassaqarfiillu pingaarnerit

Takorluugaq piviusunngortinniarlugu pingaarnerusutigut suliniuteqarfissat sisamat tunngavigineqarput:

1. Meeqqat inuusuttullu akornanni timigissarneq
2. Kajumissutsimik suliaqarnermut kulturip nukittorsarneqarnera
3. Timersornermi neqeroorutit amerlanerusut assigiinngiiaarnerusullu
4. Timersornermut atugassarititaasut pitsanngorsarneqarnerat

Suliniutit tamarmik akornanni ukkatarineqarpoq:

• Piginnaasatigut ineriartortitsineq
• Najukkani tunngavilersugaasumik ingerlatsineq
• Suleqatigiinneq

Piffissami isumaqatigiissuteqarfiusumi suliniutit pingaarnerit

Angusaqarnissamut isumaqatigiissummi suliniutit salliunneqartut arlallit ilaapput, taakkulu aalajangersimasunik angusaqartitsisussaapput.

Kajumissutsimik sulineq suleqatigiinnerlu nukittorsarlugit

Kajumissutsimik suliaqarnermut kulturi ineriartortinneqassaaq aammalu peqataanissamut periarfissat pitsaanerulersinneqassallutik. Tamanna ilaatigut suliffeqarfiit pisortallu suliffiisa suleqatiginerisigut piviusunngortinneqassaaq.

Timersornermut atortorissaarutit pitsaanerusut

Nunami tamarmi timersornermut atugassarititaasut isumannaatsut ineriartortitsiviusullu qulakkeerniarlugit atortorissaarutit maanna atorneqartut siunissamilu pisariaqartinneqartussat pillugit misissueqqissaartoqarpoq.

Unammisarnikkut aaqqissuussinerit ineriartortillugit

Kattuffiit ineriartortinneqarneri unammisarnerillu pitsaasumik ingerlanneqarnissaat anguniarlugu aaqqissuussinernik ineriartortitsisoqassaaq, ilanngullugit unammisarnissamut periutsit nutaat nalilersorneqarnissaat.

Suleqatigiinneq malinnaanerlu

Naalakkersuisut Timersoqatigiit Kattuffiallu suleqatigiinnerat ingerlaavartumik oqaloqatigiinneq malinnaanerlu tunngavigalugit ingerlanneqassaaq:

• Ukiumoortumik ataatsimeeqatigiinneq, salliutitat ataatsimoorussat pillugit
• Qaammatit pingasukkaarlugit aqutsisoqarfiup akornanni killiffik pillugu ataatsimiinnerit
• Ukiumoortumik nalunaarusiorneq naatsorsuusiornerlu

Tamatuma saniatigut isumaqatigiissummut ilanngussani suliniuteqarfiit aalajangersimasut ingerlaavartumik isumaqatigiissutigineqartassapput.

Ataatsimoorluta aalatitsineq pilersipparput

Angusaqarnissamut isumaqatigiissut ataatsimoorussamik anguniagaqarnermi pingaarutilimmik sakkussaavoq:

Kalaallit Nunaanni innuttaasut tamarmik timersorneq timigissarnerlu inuunerup nalinginnaasumik aammalu orniginartumik ilagissagaat.